كۆسره‌ت ره‌سوڵ عه‌لی‌ جێگری‌ یه‌كه‌می‌ سكرتێری‌ گشتی‌ یه‌كێتی‌ نیشتیمانی‌ كوردستان رایگه‌یاند كۆبونه‌وه‌ی‌ لایه‌نه‌كان له‌سه‌ر مێزی‌ گفتوگۆ چاره‌سه‌ره‌ بۆ قه‌یرانی‌ ئێستای‌ عێراق و داوایكردووه‌ رێگری‌ له‌شه‌ڕی‌ تایه‌فی‌ بكرێت.

به‌پێی هه‌واڵێكی‌ ماڵپه‌ڕی‌ فه‌رمی‌ یه‌كێتی‌، كۆسره‌ت ره‌سوڵ له‌میانه‌ی‌ كۆبونه‌وه‌ی‌ له‌گه‌ڵ عادل عه‌بدولمه‌هدی و سه‌ید موحسین حه‌كیم و محه‌مه‌د ته‌قی سه‌ركرده‌ له‌ ئه‌نجومه‌نی ئیسلامی باڵای عیراق له‌هه‌ولێر، كۆبوونه‌وه‌ی سه‌رجه‌م لایه‌نه‌كانی له‌سه‌ر مێزی گفتوگۆ به‌ پێویستزانی بۆ چاره‌سه‌ری كێشه‌كان، هه‌روه‌ها جێبه‌جێكردنی بڕگه‌و مادده‌كانی ده‌ستووری عیراقی به‌ باشترین و خێراترین چاره‌سه‌ر زانی بۆ كێشه‌كان.

كۆسره‌ت ره‌سوڵ داوای له‌ وه‌فده‌كه‌ كردووه‌ رێگربن له‌وه‌ی‌ هه‌ر شه‌ڕێكی تایه‌فی و مه‌زهه‌بی كه‌ له‌ عێراق رووبدات و مه‌سه‌له‌ی دیموكراسی و فیدراڵی به‌ ئاقارێكی تردا ببات.