راوێژكارى راگه‌یاندنى سه‌رۆكى په‌رله‌مان رایگه‌یاند: سه‌عات (11)ی پێش نیوه‌ڕۆ رۆژی دووشه‌ممه‌ رێكه‌وتی 1/4/2013 دانیشتنى ئاسایى ژماره‌ 2ى په‌رله‌مانى كوردستان ده‌ستپێده‌كاته‌وه‌.

له‌درێژه‌ى لێداونه‌كه‌یدا راوێژكارى راگه‌یاندن تارق جه‌وهه‌ر سارمه‌می وتى: بۆ ئه‌م مه‌به‌سته‌ سه‌رۆكى په‌رله‌مانى كوردستان له‌بانگهێشتنامه‌یه‌كدا داوا له‌گشت ئه‌ندامه‌ به‌ریزه‌كانى په‌رله‌مان ده‌كات، سه‌عا ت (11)ی پێش نیوه‌ڕۆ رۆژی دووشه‌ممه‌ رێكه‌وتی 1/4/2013 له‌ته‌لارى په‌رله‌مان ئاماده‌بن بۆ به‌شداریكردن له‌ دانیشتنى ئاسایى ژماره‌ 2ى په‌رله‌مانى كوردستان. له‌باره‌ى به‌رنامه‌ى كارى دانیشتنه‌كه‌ش سارمه‌مى وتى به‌رنامه‌ى كارى دانیشتنه‌كه‌ له‌چوار خاڵ پێكهاتووه‌ ئه‌وانیش:

1- خوێندنه‌وه‌ى یه‌كه‌مى پڕۆژه‌ یاساى هه‌مواركردنى یاساى ماف و ئیمتیازاتى كه‌س و كارى شه‌هیدان و ئه‌نفالكراوان ژماره‌ (9)ى ساڵى 2007، كه‌ له‌لایه‌ن ئه‌نجومه‌نى وه‌زیرانه‌وه‌ پێشكه‌ش كراوه‌.
2ـ خستنه‌ڕوو و گفتوگۆكردنى پێشنیارى یاساى كێبڕكێ له‌ هه‌رێمى كوردستان.
3ـ خستنه‌ڕوو و گفتوگۆكردنى پێشنیارى یاساى داینگه‌ له‌ هه‌رێمى كوردستان.
4ـ هه‌ڵبژاردنى سه‌رۆكى ده‌سته‌ى گشتى ده‌سپاكی له‌ هه‌رێمى كوردستان ـ عێراق له‌نێوان ئه‌م به‌ڕێزانه‌ (سامح عوسمان یونس) و (سیروان عمر امین) و ( د. احمد انور).
ده‌قى بانگهێشته‌كه‌ى سه‌رۆكى په‌رله‌مانى كوردستانه‌ بۆ سه‌رجه‌م ئه‌ندامانى په‌رله‌مان:
بانگهێشت بۆ/گشت ئه‌ندامه‌ به‌ڕێزه‌كانی په‌رله‌مانی كوردستان
به‌پێی حوكمی بڕگه‌ (1)ی مادده‌ (5) و بڕگه‌ (2) له‌ مادده‌ (17) له‌ په‌یڕه‌وی ناوخۆی په‌رله‌مانى كوردستانی عیراق, ژماره‌ (1)ی ساڵی 1992ی هه‌مواركراودا, بڕیارماندا بانگهێشتی گشت ئه‌ندامه‌ به‌ڕێزه‌كانی په‌رله‌مان بكه‌ین بۆ دانیشـتنی ژماره‌ (2)ی ئاسایی خولی گرێدانی دووه‌م ســـاڵی چواره‌م له‌ خولی هه‌ڵبژاردنی سێیه‌مى په‌رله‌مانى كوردستان- عیراق، له‌كات (11)ی پێش نیوه‌ڕۆ رۆژی دووشه‌ممه‌ رێكه‌وتی 1/4/2013، تكایه‌ له‌كاتى دیاریكراو ئاماده‌ بن. له‌گه‌ڵ رێزدا
د. ئه‌رسه‌لان بایز
سه‌رۆكى په‌رله‌مانى كوردستان
28ّ/3/2013